ခုနောက်ပိုင်း.. ကိစ္စတော်တော်များများကို စိတ်ထဲမှာ အကြာကြီးမထားဖြစ်တော့ဖို့ ကြိုးစားနေတာကြောင့်လား မပြောတတ်ဘူး.. တစ်ချို့ဟာတွေကိုဆို အစဖော်မရအောင် မေ့နေပြီ.. အဲဒါဟာ ကောင်းတာလား မကောင်းတာလား မသိဘူး..
ပြီးတော့ အသက်ကြီးလာတာနဲ့အမျှ သူများကို အရွဲ့တိုက်ပြီးလုပ်တယ် ဆိုတဲ့ကိစ္စမျိုးတွေ မလုပ်ဖြစ်တော့ဘူး.. မလုပ်မိအောင်လည်း နေတယ်.. ကိစ္စတစ်ခုကိုလုပ်ပြီဆို ကိုယ်လုပ်ချင်လို့ လုပ်တာမျိုးပဲ ဖြစ်အောင် စိတ်ကို ပြောင်းလဲယူပစ်လိုက်တယ်.. သူများကိုရွဲ့ပြီးလုပ်တယ်ဆို သူများရဲ့ထိန်းချုပ်မှုအောက်ရောက်နေတယ်ဆိုတဲ့ အယူအဆလေး ၀င်နေတာလည်း ပါတယ်ပေါ့.. ပြီးတော့ သူများအကြောင်းကို ခေါင်းထဲထည့်ထားရတာ ပင်ပန်းမှန်း ခံစားမိလာတယ်.. ဒီလိုပြောလို့ သူများကိစ္စဆို ခေါင်းထဲလုံးလုံးမထားတတ် သူများအတွက် မတွေးပေးတတ်တဲ့ လက်လွတ်စပယ်လူမျိုးဖြစ်အောင်အထိတော့ မဟုတ်ပါဘူး.. ခေါင်းထဲထည့်ထားသင့်သူ ထည့်ထားသင့်တဲ့ကိစ္စမျိုးလောက်ပဲ ရှိနေအောင် ကြိုးစားနေဖြစ်တော့တာ.. ဘာဖြစ်လို့လဲဆို ကျွန်တော်တို့ နေရတဲ့ဘ၀က တိုတိုလေးပါ.. ကိုယ့်ဘ၀အတွက် အရေးမပါ အရာမရောက်တဲ့ ကိစ္စတွေနဲ့ အချိန်ကုန်ပစ်ရမယ်ဆို ကျွန်တော်တို့လုပ်ချင်တာတွေ မလုပ်လိုက်ရဘဲ နေမှာပေါ့.. ဒီလို တွေးထားတာတောင် လုပ်သင့်တဲ့ကိစ္စတွေကို ရာနှုန်းပြည့် မလုပ်နိုင်သေးတာ ကိုယ့်ကိုယ်ကိုယ်တွေ့နေရတယ်..
နောက်တစ်ခု သူများကို အရွဲ့တိုက်ပြီးတစ်ခုခုလုပ်လိုက်ရင် ကိုယ့်စံနှုန်းနဲ့ မကိုက်၊၊ ကိုယ့်စံတွေကနေ သွေဖယ်သွားတယ်လို့ ကိုယ့်ကိုယ်ကိုယ်ခံစားမိတာမို့ အရွဲ့တိုက်တယ်ဆိုတဲ့ကိစ္စ မလုပ်မိအောင် နေမိတာလည်း ဖြစ်မယ်.. ပြီးတော့ တဖြည်းဖြည်းသိလာတာနဲ့အမျှ အရွဲ့တိုက်တယ်ဆိုတာ ကလေးဆန်တဲ့အပြုအမူ စာရင်းထဲ ထည့်ထားမိလိုက်တာကြောင့် လူကြီးဆန်ချင်တဲ့ကျွန်တော် အရွဲ့တိုက်တဲ့အလုပ်တွေ မလုပ်ဖြစ်တာပဲ နေမှာပါ.. ရှိသေးတယ်.. အရွဲ့တိုက်ရင် ဖျောက်ဖျက်ဖို့ ကိုယ်ကြိုးစားနေတဲ့ ကိုယ့်ရဲ့မကောင်းတဲ့အကျင့် မကောင်းတဲ့စိတ်လေးတွေလည်း ပြန်ပြန်ရောက်လာတတ်လို့ နေလိမ့်မယ်.. ဒီ့အပြင် အရွဲ့တိုက်တယ်ဆိုတာ နှစ်ဖက်လုံး အရှုံးမရှိတဲ့အနေအထားကို မဖန်တီးနိုင်ဘူးလို့ ယူဆမိလို့လည်း ဖြစ်ပါလိမ့်မယ်..
ဘာရယ်မဟုတ်ပါဘူး.. ကျွန်တော့်ပတ်ဝန်းကျင်မှာ တွေ့နေ ကြားနေရတဲ့ ငါက သူများထက် ပိုရွဲ့တတ်တယ်ဆိုတဲ့ ဂုဏ်ယူတာလား .. ကိုယ့်ကိုယ်ကိုယ် ဂုဏ်တင်တာလားမသိတဲ့ (အမှန်ကတော့ ဖြစ်နေတဲ့ပြဿနာကို
သေချာမဖြေရှင်းနိုင်တာနဲ့ပဲ အလွယ်ကောက်သုံးလိုက်တဲ့ ဆေးမြီးတို ) စကားတစ်ခုကို ၊ ကိုယ့်အတ္တကို လွဲမှားစွာ အရောင်ပြန်တင်တဲ့ နည်းလမ်းတစ်ခုကို ကိုယ်ကျင့်သုံးနေမိသေးလားလို့ ပြန်စဉ်းစားရင်း ဒီပို့စ်ကို ရေးဖြစ်တာပါလေ..
Friends
Subscribe To
Posts
Comments